ceramah BUGIS tentang surah al falaq

بسم الله الرحمن الرحيم

اَلْحَمْدُ للهِ رَبِّ اْلعَا لَمِيْنَ. وَالصَّلَاةُ وَالسَّلَامُ عَلَى اَشْرَفِ اْلاَنْبِيَاءِ وَاْلُمرْسَلِيْنَ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ

Sininna ata malebbi’na puangallata’ala engkae hadere

Alhamdulillah wasyukrillah, sinninna pappenyenyamengnge iyya engkae simanata nawerengngi puangallata’ala esso nenniya wenni waji’i isukkuruki, muttamaki wawang madoraka narekko pada engka manekki massakkarengngi rigau engkana de’ tasukkurukiwi nasibawai akkasiwiang ri puangallata’ala padatoha iya pada engkae maneng ipasilennereng iyye wennie. Mammagi-magi puangallata’ala natarima malempui sininna akkatta madecetta maneng, serekkuammengngi nawerengngi pammase ri lino makkotoparo matti riesso rimunrinna puangallata’ala. Aamin.

            Makkotoparo paimeng muttamaki wawang nawereng asalamakeng puangallata’ala rigau engkata simata massalawa enrengnge mappassalama ri nabitta Muhammad Saw. Nabi iyya engkae riutusu mancaji pammase risininna alangnge.

Sininna ata malebbi’na puangallata’ala engkae hadere

Rilalenna akorang malebbi’na puangallata’ala engka siddie surah iyya marepe’e ribaca enrengnge riengkalinga ri pallawangetta iyyanaritu surah “al-falaq” iyyarega iyya masahoroe ripada idi’ maneng iyyanaritu “QUL ‘AUZU BIRABBIL FALAQ”.

Narampei puangallata’ala rimajeppunna makkeda:

قل اعوذ برب الفلاق.  من شر ماخلق. ومن شر غاسق إذا وقب. ومن شر النفثت فى العقد. ومن الشر حاسد إذا حسد.

Bettuangngenna : “Poadai ee Muhamma’ makkeda “mallinrungnga ri puang makuasangngi subue”. Pole ripappeja’na anu napancajie. Enrengnge pole ripappeja’na wennie narekko mapettanni. Enrengnge pole ripappeja’na makkunrai passehere’e, penrungengngi singkerrukerru’e. enrengnge pole ripappeja’na tau masiri atie narekko masiri atiwi”

            Sininna ata malebbi’na puangallata’ala engkae hadere

            Napahangngi anregutta pattapsere’e makkeda naiyya surae engkairitu mancaji papparengngerrang ri nabitta enrengnge ri sininna tau mateppe’e. kuammengngi engkai simata maddakka ri puangallata’ala pole ri tungke-tungke anu ritaurie mallinrungngetogi mannessaetogi, rissengtogi tenrissettogi. Natimpai pammasena puangallata’ala nanapoadangngi atanna makkada “laono mai muillau tulung enrengnge muillau allinrungeng (naseng puangallata’ala). Nasaba de’gaga pakkuraga iyya wedding ripapole sangngadinna pammasena puangallata’ala bawang ri amminasang.

            Sininna ata malebbi’na puangallata’ala engkae hadere

Magai nawettu subu nakkelorengngi puangallata’ala millau tulung serekkuammengngi natomallinrung, nasaba engakairitu wettu subue napakei rupa tauwe jokka sappai dalle iyya ekkae ri passadiangngi pole ri puangallata’ala, okkonie maaega mabiasa pappeja yarega pappesukkara rioloi.

            Makkotoparo paimeng Magai nawettu wenni narekko poleni pettang nakkeloreng tokki puangallata’ala millau tulung serekkuammengngi natomallinrung? Nasaba nareko wennini namapettang pada mappatuju maneng tosi tau ja’e enrengnge jingnge kowaetopa olokolo’e papolei gau-gau ja’na…aaa.. iyyanae nassabari nakkeloretta puangallata’ala millau allinrungeng.

            Sininna ata malebbi’na puangallata’ala engkae hadere

            Rilalenna topa iyyae aya’e risuroi nabitta ri puangallata’ala millau allinrungeng pole sirupa pappeja mannessae pappesukkara’na namasussa rijagai koritu. Gangnganna parellu maddararing ri puangnge naripodang makkeda : “ellau allinrungko pole ripappeja’na passehere’e”.

            Makkedai anregurutta اَلزَّ مَخْشُرِىْ  iyyaro makkunrai passehere’ de’ nappunai akkebate sangngadinnami narekko napasibawaiwi anre-anre iyarega inungeng-inungengnge kuaetopa bau-baue. Naiyyatosi akkebatena sehere’e weddingngi napasisalasala nassarang-sarang tau sipojie, makkullei mambua uraga malomoe ritarima maumani belle napapole.

            Sininna ata malebbi’na puangallata’ala engkae hadere

            Risurotoi nabitta  ص م   mellau allinrungeng ri  puangallata’ala pole risirupae pappeja iyyanaritu asiriatianna tau masiri atie. Nasaba iyyaro siri atie nammenasaiwi allesangenna pappenyameng riwerengnge ri siddie rupa tau. Sibawa iyyaro siri atie nanrei decengnge pappadatoha nanrena api aju tunungengnge.

            Sininna ata malebbi’na puangallata’ala engkae hadere

Jaji, mannesani ri pada idi maneng iyya engkae mattepe’e makkada, nakkelorengngi puangallata’ala serekkuammengngi simata maddararing mellau allinrungeng pole risininna anu napancajie. Enrengnge pole ripappeja’na wennie narekko mapettanni. Enrengnge pole ripappeja’na makkunrai passehere’e, enrengnge pole ripappeja’na tau masiri atie narekko masiri atiwi.

اَعُوْذُ بِكَلِمَاتِ اللهِ التَّا مَاتِ مِنْ شَرِّ مَا خَلاَقَ.

            Mammagi-magi puangallata’ala simata nawerengngi apatiroang nawedding salama ri lalenna atuo-tuongetta rilino lettu matti riesso rimunrinna puangallata’ala.

والله يتولى الصا لحين

والسلام عليكم ورحمة الله وبركا ته