ceramah Bugis tentang ORANG syuukur

( TAU SUKKU’ SUKKURU’E )

Mahmud Nurdin *

السلا م عليكم ورحمة الله وبركاته

الحمد لله رب العا لمين, الرحمن الرحيم, مالك يوم الد ين و الصلاة  والسلا م على اشرف الانبياء و المرسلين. اما بعد

Sininna Ata malebbi’na puang Allah Ta’ala

Sitinajasiki mennang passukkui tanra asukkurukeng marajata risesena puang sewwae, puang pancajiengngi lino lollong lise, puang paturungnge pammase ri sinna alangnge. Nasaba siddie ata mateppe’ iyanaritu ata iya engkae simata sukkuru nasaba pappenyameng rigau engkana maladde narasakang esso wenni, makkotoparo paimeng maladde sabbara narekko natujui perri yarega sussa simata engkai mappisanre ri puang Allah Ta’ala.

Salawa enrengnge passalama ikiringeng masse’i risese alebbirenna nabitta Muhamma’ tau nasserie pammase nenniya asalamakeng. Mammagi-magi engka manekki nawereng safaat riesso rimonrinna puang allah ta’ala nasaba salawa ri nabitta.

اللهم صلى وسلم على سيدنا محمد وعلى اله وصحبه وسلم.

Sininna Ata malebbi’na puang Allah Ta’ala

            Ri lalenna akorang malebbi’na puang Allah Ta’ala narampei rimajeppunna makkada:

لقد خلقنا الانسا ن فى احسن تقويم

Bettuanna :”majeppu ripancajiwi rupa tauwe rilalenna asukkukeng enrengnge akessingeng ancajing”

            Ripahang madeceng manenni ripallawangetta makkada majeppunna rupa tauwe engkai ritu riwereng asukkukeng enrengnge alebbireng serekkuammengngi napakai molai atuo-tuongenna rilebo’na tanae rilalenna minrui mancaji khalifah yarega pemimping. Immenggi pemimping masyaraka’, keluarga, makkutoparo pemimping riwatakkaleta maneng.

            Jaji, topada makkulle-kuleangngi sukkuruki alebbireng enrengnge akessingengnge iya nawerengngi puangnge untu’ pigaui passuroanna enrengnge manini pole ripappesangkana iya engkae ritunturengngi rilalenna agama sellengnge.

            Narimakkuannaro, tau lolongengnge riona puang allah ta’ala iyanaritu tau sukkurukie alebbirenna enrengnge akessingenna nasibawai pangkaukeng iya purae nawerengngi rilalenna ancajingetta idi’ rupa tauwe.

            Makkutoparo paimeng, tau lolongengnge caina enrengnge dorakana puang allah ta’ala iyanaritu tau de’e nasukkuruki alebbirenna enrengnge akessingenna nasibawai pangkaukeng iya purae nawerengngi rilalenna ancajingetta idi’ rupa tauwe.

            napasengi tokki tomatoatta riolo makkada “narekko tomaccamming, engka dua isingkerruang. masiddinna, narekko ripahanni aleta makessing, aja’na rijamai jama-jamang yarega pangkaukeng iya weddingnge solangi akessingetta. maduanna narekko ripahangngi aleta engka maja’ enrengnge engka maja riseseta, aja’tona narijama pangkaukengnge iya weddingnge tambai ja’ta nasaba sipulunnitu ja’e riseseta”.

            makkadai taro bicarana puang allah ta’ala :

وقال رب أوزعني ان اشكر تعمتك التي انعمت علي وعلى ولدي وان اعمل صالحا ترضاه

“ee….puang, tawerengngi atammu apatiroang rigau engkana sukkuruki pappenyamengnge iya engkae ripakkedalleki enrengnge toduae pajajiakku enrengnge untuk pigaui decengnge rilalenna laleng tapurioe.

makkadai taro bicarana toriolota rimajeppunna makkada “sadda mappabbate ada, ada mappabbate gau, gau mappabate tau, iyami nariyaseng tau narekko siturui ada-adanna sibawa pangkaukenna.

هذا من فضل ريى ليبلونىء أشكر ام اكفر

            Bettuanna :iyyanae pappenyamenna puakku, serekkuammengngi naitai puang Allah ta’ala engkagi tosukkuru yarega tomadoraka”.

            rilalenna agamata agama sellengnge, pura natoro maneng pekkogi lao-laona yarega taratte’na sukkuru’e.

masiddinna; sukkuru’ nasaba ati. تصديق بالقلب iyanaritu nattokeng ati makkada sininna pappenyamengnge iya engkae irasakang engka manengngi pole risiddie asseleng iyanaritu puang allah ta’la.

maduanna; sukkuru’ nasaba lilla  إكرار بالسان iyanaritu naleppakeng lilla makkada الحمد لله رب العالمين, sininna pappenyamengnge, sininna pappojie punnana maneng puang allah ta’la.

matellunna; sukkuru’ nasaba pangkaukeng وعمل بالاركان iyanaritu kedo-kedo nasibawai pangkaukeng watakkale pigaui passuroanna agamata enrengnge maladde manini pole ripappesangkan puang allah ta’ala.

اللهم أعني على ذكرك وشكرك وحسن عبادتك

mammagi-magi puang Allah ta’ala nawerengngi adisingeng, makkotoparo asalamakeng serekkuammengngi topada sukkuru maraja makkasiwiang rigau engkata maneng macinna lolongeng rio rennunna puang Allah ta’ala.

والله يتولى الصالحين

والسلام عليكم ورحمة الله وبركاته