ceramah Bugis tentang DANGKANGENG AHERA"

بسم الله الرحمن الرحيم

اَلْحَمْدُ للهِ رَبِّ اْلعَا لَمِيْنَ. وَالصَّلَاةُ وَالسَّلَامُ عَلَى اَشْرَفِ اْلاَنْبِيَاءِ وَاْلُمرْسَلِيْنَ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ

                                  

Sininna ata malebbi’na puangallata’ala engkae hadere

Alhamdulillah wasyukrillah, sinninna pappenyenyamengnge iyya engkae simanata nawerengngi puangallata’ala esso nenniya wenni waji’i isukkuruki, muttamaki wawang madoraka narekko pada engka manekki massakkarengngi rigau engkana de’ tasukkurukiwi nasibawai akkasiwiang ri puangallata’ala padatoha iya pada engkae maneng ipasilennereng iyye wennie. Mammagi-magi puangallata’ala natarima malempui sininna akkatta madecetta maneng, serekkuammengngi nawerengngi pammase ri lino makkotoparo matti riesso rimunrinna puangallata’ala. Aamin.

            Makkotoparo paimeng muttamaki wawang nawereng asalamakeng puangallata’ala rigau engkata simata massalawa enrengnge mappassalama ri nabitta Muhammad Saw. Nabi iyya engkae riutusu mancaji pammase risininna alangnge.

Sininna ata malebbi’na puangallata’ala engkae hadere

            Ri lalenna tapsere bahasa ogi’na Gurutta Kali Sidenreng narampaei rimajeppunna makkada engka siddie riwaya’ makkada saisana sahaba’na nabitta’ SAW napoadanggi nabitta makkada…..”ee…surona puangallata’ala mammenasaki mennang missengngi kegaero dangkangeng kaminang napojie puangallata’ala ridangkangeng”. Agana naturunna aya’e..

يَاَيُّهَا اَّلذِيْنَ اَمَنُوْا هَلْ اَدُلُّكُمْ عَلَى تِجَارَةٍ تُنْجِيْكُمْ مِنْ عَذَابٍ عَلِيْمٍ.

 تُؤْمِنُوْنَ بِاللهِ وَرَسُوْلِهِ وَتُجَاحِدُوْنَ فِى سَبِيْلِ اللهِ بِاَمْوَالِكُمْ وَاَنْفُسِكُمْ ذَلِكُمْ خَيْرٌ لَكُمْ اِنْ كُنْتُمْ تَعْلَمُوْنَ.

Bettuanna :”ee..sininna tau mateppe’e maelokoga mennang ujellokeng siddi dangkangeng weddingnge paleppe’kko pole ripaccalla maserro mapeddi’e”.

                     “Mateppe’ko mennang ri puangallata’ala enrengnge risurona namupada mattongeng-tongeng rilalenna agamana puangallata’ala nasaba waramparammu mennang enrengnge alemu mennang. Iyanarekkuaero maserro deceng mupunnai mennang narekko pada engka manekko missengngi koritu”.

Jaji nakkelorengngi puangallata’ala piarai kuammengngi namasse’ teppe’e rilalenna aromu mennang, enrengnge passimatai puangallata’ala.

Mattongeng-tongeng rilalenna agamana puangallata’ala. Mattongeng-tongeng linrungiwi enrengnge pallebbangngi agamana puangallata’ala nasaba watakkalemu nenniya waramparammu mennang. Naiya attongeng-tongengnge rilalenna agamana puangnge engka nengka naparellu mammusu linrungiwi agamana puangallata’ala. Engkato nengka naparellu rimusu’ cinna napessue naripassa kuammengngi aja naturusiwi nacinnaie. Enrengnge engkato nengka natomattongeng-tongeng paddupai ampe madecengnge naritettang enrengnge nariabbokori sininna ampe matunae. Iyyanaro nakkelori puangallata’ala dangkangeng kaminang malebbi risesena tau mateppe’e narekko pada engka memengmui missengngi.

Sininna ata malebbi’na puangallata’ala engkae hadere

Rilalenna sambungenna aya’e denre’…nasambungngi puangallata’ala makkada naiya assele’na dangkangeng najjellokengnge puangallata’ala narekko ripapolei….ee…naddampengengi puangallata’ala dosamu mennang nasaba appakalebbirenna. Enrengngetopa napauttamaki rilalenna suruga pammasena puangallata’ala.

            Jaji….naiyya dangkangeng napparentangnge puangallata’ala, iyyanaritu; masiddinna…mateppe ri puangallata’ala; maduanna… mateppe ri surona enrengnge; matellunna…..mattongeng-tongeng rilalenna agamana puangallata’ala.

Sininna ata malebbi’na puangallata’ala engkae hadere

            Ahh….waddinni ripahang makkada ;

Masiddinna : narekko engka jama-jama nassuroang puangallata’ala rijama rilalenna kitta’na ee…parellutu yarega waji’ asenna…

Naiyasengnge waji’ iyanaritu narekko rijamai nasibawai nia’ madeceng engkairutu lolongeng deceng yarega appalang makkotoparo narekko ritettangngi mannessai lolongengngi dosa yarega sussa.

Maduanna :   narekko engka jama-jamang nappesangkang puangallata’ala rijama rilalenna kitta’na ee…harangngitu yarega parellui ribelai….

Naiyasengnge harang iyanaritu narekko rijamai mannessai lolongen dosa..naikiya narekko rininiriwi nasibawai nia’ madeceng engkairutu lolongeng deceng yarega appalang.

وَمَنْ جَاهَدَ فَإِنَّمَا يُجَاهِدُ لِنَفْسِهِ

“Nigi-niga matttunru-tunru majeppu assele’na attunru-tuntunna alenamuto duppai”

Sininna ata malebbi’na puangallata’ala engkae hadere

Narekko ipikkiriki denre’ passuroangnge rilalenna aya’e….eeee,,,de’to namarejjing yarega namasussa, narekko ipikkirikimi bawang… eke…narekko tomabbicara appaddupang yarega pangkaukeng..ee.. marejjinni yarega masukkara’ni ripapole nakarena maegana jama-jamang lino enrengnge cinna napessui iyya weddingnge palesse’i rilalenna laleng naporioe puangallata’ala. Turu’ rilalenna Haddese’ Qudesie’ narampei Puang Allata’al rimajeppunna makkada :

إِنِّيْ خُلِقْتُ عِبَادِيْ حُنَفَاءُ كُلِّهُمْ وَإِنَّهُمْ اَتَتْمُ الشَّيَاطِيْنِ فَاجْتَالَتْهُمْ عَنْ دِيْنِهِمْ. (رواه مسلم)

Bettuanna : “Majeppu engkairitu upancaji sininna atakku rilalenna atepperengnge, naikiya pappakabilingpilinnami setangnge nassabari namabela pole ri agamana”.

            Siddi tanra makkada, naiya pakkuragana setangnge serekkuammengngi napakabiling-pilingngi umma’ sellengnge aja’ naitai bati… de’ napaja simata makkuranga palesse’i teppe’ta enrengnge pakkasiwiatta pole ri puangallata’ala. Tacobani pikkkiriki yarega ranna-rannai keadaangnge makkokkoe….yako tanni teppe enrengnge tau ri puangallata’ala ripake, nalaki solo’na lino.. yako jama-jamang linomo tapileini tapoji…magampangnge, masittae, madecengnge, maja’e… nita mata ripallawangetta..

Naiiyanae narampewe Gurutta Kali Sidenreng makkada : Accamali-maliko naiyakiya aja mumali, acciori leko’na solo’e.. bettuanna, globalisasi atau kemodern pengetahuan harus diikuti, akan tetapi jangan sampai dampak negative dari itu bisa membuat hati dan perbuatan kita juga terbawa.

Sininna ata malebbi’na puangallata’ala engkae hadere

            Nag…agana pakkuraga serekkuammengngi nawedding simata engkaki tuli matturu rilenna laleng naporioe puangallata’ala, enrengnge namasse teppe’e maddibola rilalenna atitta, makkotoparo paimeng tuli makkuraga pigaui parentana puangallata’ala enrengnge maninni, mabela pole ripappesangkana nawedding salama ri lalenna atuo-tuongetta rilino lettu matti riesso rimunrinna puangallata’ala. Nakkelorengngi Nabitta Muhamma’ SAW ripabbiasa bacai siddi paddoange iyya nappagguruangnge;

اَلَّلهُمَّ إِنَّيْ اَسْأَلُكَ اْلهُدَى وَالتُّقَى وَاْلعَفَافَ وَاْلغِنَى.

Bettuanna :”Ee puang..majeppu uwillauwiki apatiroang nenniya tau yarega teppe’ enrengnge aninireng kuwaetopa asogireng”.

Sininna ata malebbi’na puangallata’ala engkae hadere

            Mammagi-magi puangallata’ala simata nawerengngi apatiroang nawedding salama ri lalenna atuo-tuongetta rilino lettu matti riesso rimunrinna puangallata’ala.

Sikira-kira maggangkani uwala ada assiparingngerrangeng, mammuare’ engkai mabbarakka ripada idi maneng lebbi-lebbipa ritau mabbicarae. nareko engka ada-adakku tassala, addampengetta simata uwillau nasaba iyyatu atassalangengnge mannessa engkai ri rupa tauwe.

والله يتولى الصا لحين

والسلام عليكم ورحمة الله وبركا ته