ceramah Bugis TABAYYUN

بسم الله الرحمن الرحيم

اَلْحَمْدُ للهِ رَبِّ اْلعَا لَمِيْنَ. وَالصَّلَاةُ وَالسَّلَامُ عَلَى اَشْرَفِ اْلاَنْبِيَاءِ وَاْلُمرْسَلِيْنَ وَعَلَى اَلِهِ وَصَحْبِهِ اَجْمَعِيْنَ. اَمَّا بَعْدُ

Sininna ata malebbi’na puangallata’ala engkae hadere

Alhamdulillah wasyukrillah, sinninna pappenyenyamengnge iyya engkae simanata nawerengngi puangallata’ala esso nenniya wenni waji’i isukkuruki, muttamaki wawang madoraka narekko pada engka manekki massakkarengngi rigau engkana de’ tasukkurukiwi nasibawai akkasiwiang ri puangallata’ala padatoha iya pada engkae maneng ipasilennereng iyye wennie. Mammagi-magi puangallata’ala natarima malempui sininna akkatta madecetta maneng, serekkuammengngi nawerengngi pammase ri lino makkotoparo matti riesso rimunrinna puangallata’ala. Aamin.

            Makkotoparo paimeng muttamaki wawang nawereng asalamakeng puangallata’ala rigau engkata simata massalawa enrengnge mappassalama ri nabitta Muhammad Saw. Nabi iyya engkae riutusu mancaji pammase risininna alangnge.

Sininna ata malebbi’na puangallata’ala engkae hadere

            ri lalenna tapsere’ mabbahasa ogina Gurutta Kali Sidenreng, engka siddi aya’ rilalenna akorang malebbi’na puangallata’ala najelaskang rimajeppunna makkada :

يَااَيُّهَا الَّذِيْنَ اَمَنُوْا اِنْ جَاءَكُمْ فَاسِقٌ بِنَبَإٍ فَنَبَيَّنُوْا اَنْ تُصِيْبُوْا قَوْمًا بِجَحَالَةٍ فَتُصْبِحُوْا عَلَى مَا فَعَلْتُمْ نَادِمِيْنَ.

Bettuanna : “…ee..sininna tau mateppe’e narekko natiwirekko seddie tau pase’ kareba paressa madecengngi riolo’. Kuammengngi aja mupakennaiwi siddie wawang sussa rigau engkamu temmuisseng. Muancajina tau massesse’ kale masse riiyana mupugaue”.

Sininna ata malebbi’na puangallata’ala engkae hadere

            Rilalenna iyyae aya’e mabberei puangallata’ala siddi akkatenniang makkada narekko napoleiki kareba kuammengngi aja’ natomagatti mala appettung riolo’ yarega kesimpulang tenriparessa madeceng karebaero. Kuammengngi aja’ natotassala mala apettung nassabarini napoleiki sesse’ kale maddimonri

            Engka siddi riwaya’ napessu Pangngulutta AHMAD enrengnge IBNU ABI HATIM nenniya ATTHAERANI kuaetopa IBNU MARDUWIYYAH pau pole ripangullutta IBNU ABBAS RA makkedai. Iyye aya’e turungngi ripassalenna AL WALID IBNU AQIBAH IBNU ABI MUITH riwettunna risuro rinabitta ص.م. lao ri BANI AL MUSTHLAQ tarimai sekke’na purae mennanro napaddeppungeng yarega napasipulung. Naiya riwettunna naengkalinganana BANI Al MUSTHALAQ apolengenna utusanna nabitta pada marennuni nasedding lao duppaiwi riwirinna kampongnge. Nairiwettu naissennana AL WALID karebaero nasenni messu tajengngi maelo mpunoi. Agana nalisuna paimeng lao ri nabitta, nakkeda ri soruna puangallata’ala rimajeppunna mennanro BANI AL MUSTHALAQ teai passu’i sekke’na. aga namaserrona gellinna surona puangallata’ala mengkalingai rekkuaero karebae gangkanna narencanakangngi maelo musu’i mennanro.

            Sininna ata malebbi’na puangallata’ala engkae hadere

            Namattengngangngi napikkiri’ nabitta jama-jamangngero natakko engkai pole utusanna BANI AL MUSTHALAQ napodangngi nabitta makkeda… ee..surona puangallata’ala nalettukiki kareba rimajeppunna utusatta lisu tengnga laleng nade’ nalettu. Namajeppu engkaki ritu metau narekko alisuanna utusatta wedding mancajiwi siddi sussa rigauna iyyewe kajajiangnge. Aga napaturunni puangallata’ala iyyewe aya’e..

            Sininna ata malebbi’na puangallata’ala engkae hadere

            Makkedai Anregurutta IBNU KATSIR iyyanae riwaya’ kaminang makessing pannesai saba’na naturung denre aya’e.

            Natapsere’i Gurutta Kali Sidenreng rimajeppunna makkada akkattana. Aja’ lalo nateppa muatepperiwi narekko engka tau pase’ palettu’ kareba. Paressa madecengngi riyolo’ aja’ ammanaha kareba bellemi namaelo mappasisala-sala. Manessapi atongenna nainappa malako apettung yarega kesimpulang kuammengngi aja’ mutassala mala apettung nassabaki gau-gau sala nade’ muissengngi. Muancajina tau massesse’ kale nasaba narekko tau pase’ tiwi kareba de’na naetauri bellewe, maccatotu poada ada belle.

            Rilalenna LONTARA OGI’e narampei rimajeppunna makkada “Unga tabbakkae’ ri subue narekko mompo’ni essoe pajani baunna”, artinya kembang mekar di waktu subuh, di kala matahari terbit baunya pun hilang. Artinya: Jangan langsung percaya atau gembira mendengar berita atau janji yang muluk-muluk, sebab berita tersebut mungkin saja tidak sesuai dengan kenyaataan.

            Sininna ata malebbi’na puangallata’ala engkae hadere

            Jaji, agguruang maraja wedding rilolongeng iyyanaritu :

Masiddina,…. kake’lai tatimbang-timbangngi narekko engka siddi kareba poleiki. Bahasa agamana iyyanaritu TABAYYUN artinya klarifikasi atau cek dan recek kebenarannya. Nasaba wettue makkokkoe, maega ladde’ni ripallawangetta iruntu kareba iyya de’e niruntu’ kanja’na yarega tongenna. Akkalitutuki umma’ selleng malebbi’ku engkae hadere’. Maegani rilolongeng, nitaemata togi yarega de’e nitai mata. Ri talapise, ri sure’kabara’e, rilaennatogi.

Maduanna…. Narekko takko naddennuakki yarega naporennuki tauwe palettu’ siddi’ kareba madeceng, aja’ lalo tapoloi rennunna taue, palettukengngi karebae sibawa madeceng.

Matellunna…… iyyami natepperiki tauwe nasaba atitta’mi nasibawai ada tongeng napangkaukeng lanro ale. Sisemmi naruntu tauwe mabbelle’ marejjinni ritu natepperi tauwe rimunrinna.

Maeppa’na…. iyyewe denre’ aya’e…engkai ritu secara khusus langsung ditujukan kepada orang-orang yang beriman. Nasaba teppe’na serekkuammengngi nawedding moloiwi iyyewe jama-jamangnge.

Malimanna…..yasengnge tau fase’ iyyanaritu tau de’e namitau ri puangallata’ala rigau engkana jamai siddie pakkasiwiang, gangkanna engkairitu macapa risinna pangkaukenna namajae.

اَلَّلهُمَّ لَا سَهْلًا اِلَّا مَا جَعَلْتَهُ سَهْلًا وَاَنْتَ تَجْعَلُ اْلحَزْنَ اِذَا شِئْتَ سَهْلًا.

            Iyyamanennaro denre’ pattampana puangallata’ala ri idi’ maneng tau mateppe’e. Mammagi-magi puangallata’ala simata nawerengngi apatiroang nawedding salama ri lalenna atuo-tuongetta rilino lettu matti riesso rimunrinna puangallata’ala.

والله يتولى الصا لحين

والسلام عليكم ورحمة الله وبركا ته